23.08.2017 | Fréttir

Verkkeppni: Hvernig verður Ísland tæknivæddasta land í heimi árið 2030?


Í tilefni af 100 ára afmæli Viðskiptaráðs Íslands stendur ráðið fyrir verkkeppni (e. case competition) í fyrsta sinn. Verkkeppnin gengur þannig fyrir sig að 4-5 manna lið hafa eina helgi til þess að móta hugmynd er snýr að spurningunni “Hvernig verður Ísland tæknivæddasta land í heimi árið 2030?”. Ótal mörg tækifæri fylgja tæknivæðingunni og hinni svokölluðu 4. iðnbyltingu sem nú gengur yfir en áskoranir felast í því að nýta nýjar leiðir til að miðla upplýsingum, mennta einstaklinga og sinna störfum á fjölbreyttari hátt en áður. Liðin eiga að koma auga á eina slíka áskorun, eða fleiri, og koma með mótaða tillögu að lausn á vandamálinu. Keppnin er ætluð einstaklingum með fjölbreyttan bakgrunn og geta lausnirnar því verið eins ólíkar og þær eru margar. Liðin geta einblínt á það svið sem þau hafa þekkingu og áhuga á, hvort sem það er að endurhugsa íslenskt lagaumhverfi, bæta samgöngumál, stokka upp í menntakerfinu eða sjálfvirknivæða stjórnsýsluna. Eina krafan er að lið séu lausnamiðuð og frumleg í sinni nálgun.

Föstudaginn 15. september hlusta liðin á fyrirlestra þar sem verkefnið er útskýrt í frekari smáatriðum. Þá er liðunum til halds og trausts fjölbreyttur hópur leiðbeinenda úr atvinnulífinu, svokallaðir „mentorar“. Boðið er upp á morgunmat, hádegismat og kvöldmat alla daga og endar keppnin á veglegum kvöldverði fyrir keppendur.

Dómnefnd keppninnar skipa:

Hvenær?
Keppnin er haldin helgina 15. – 17. september og hefst kl. 8 á föstudeginum. Undir lok sunnudags munu liðin kynna hugmyndir sínar og tillögur að lausn fyrir dómnefnd og í kjölfarið er lokahóf með kvöldverði um kvöldið.

Hvar?
Keppnin er haldin í húsakynnum Háskólans í Reykjavík, Menntavegi 1. Vinningshafar verða tilkynntir við athöfn í hátíðarsal Háskóla Íslands fimmtudaginn 21. september, þegar Viðskiptaráð fagnar 100 ára afmæli sínu. Kristján Þór Júlíusson menntamálaráðherra veitir sigurliðinu verðlaunin auk þess sem forseti Íslands, Guðni Th. Jóhannesson og Dominic Barton forstjóri McKinsey & Company á heimsvísu ræða við hátíðargesti í tilefni dagsins.

Fyrir hverja?
Um mjög opið umfjöllunarefni er að ræða og fjölbreytni og frumleiki skipta hér miklu máli. Þverfagleg lið eru sérstaklega velkomin þar sem unnið er þvert á greinar sem og skóla. Hægt er að sækja um sem einstaklingur eða lið. Einstaklingum sem sækja um er hópað saman í lið.

Til hvers?
Þátttakendum gefst tækifæri til að öðlast reynslu í að leysa flókin vandamál á stuttum tíma, og fá samhliða því áheyrn hjá áhrifafólki úr íslensku efnahagslífi. Þá kynnast þátttakendur fjölbreyttum hópi fólks úr atvinnulífinu auk þess sem sigurvegararnir fá að kynna lausn sína fyrir viðeigandi ráðherra.

Þar að auki fá þátttakendur sigurliðsins ferð til Silicon Valley í Kaliforníu þar sem fremstu tæknifyrirtæki heims, til dæmis Facebook, Google og Uber verða heimsótt, auk 100.000 kr peningaverðlauna á hvern þátttakanda.

Hvernig?
Þú getur skráð þig eða þitt lið með því að smella á hlekkinn hér að neðan. Umsóknarfrestur er til og með 12. september.



Leiðbeinendur liðanna eru eftirfarandi:

  • Brynja Guðmundsdóttir - Stofnandi AZAZO
  • Elín Helga Sveinbjörnsdóttir - Framkvæmdastjóri Hvíta Hússins
  • Frosti Ólafsson - Forstjóri ORF Líftækni
  • Guðmundur Guðnason - Forstöðumaður stafrænnar viðskiptaþróunar hjá Icelandair
  • Halldór Benjamín Þorbergsson - Framkvæmdastjóri Samtaka Atvinnulífsins
  • Helga Valfells - Eigandi og stjórnandi Crowberry Capital
  • Salóme Guðmundsdóttir - Framkvæmdastjóri Icelandic Startups
  • Stefanía G. Halldórsdóttir - Framkvæmdastjóri CCP