07.10.2019 | Umsagnir
Fjárlög - hagkerfið í járnum
Viðskiptaráð hefur skilað inn umsögn um frumvarp til fjárlaga fyrir árið 2020 og frumvarp um breytingar á tekjuskatti. Fjárlögin endurspegla og ráðast af stefnu stjórnvalda í ýmsum málefnum og því fjallar umsögnin ekki einungis um atriði er snúa beinlínis að ríkisfjármálum, heldur einnig stefnu stjórnvalda í víðara samhengi.
Helstu atriðin sem Viðskiptaráð vill koma á framfæri eru:
- Sjaldan hefur verið jafn mikilvægt að stjórnvöld setji samkeppnishæfni í fyrsta sætið. Í því skyni er hægt að lækka launakostnað, sem er með því hæsta sem gerist í Evrópu, og lækka tryggingagjald enn meira. Einnig hvetur ráðið til hraðari og meiri lækkunar bankaskatts.
- Flest bendir til þess að staðan í efnahagslífinu sé þung um þessar mundir og má segja að hagkerfið sé í járnum. Vísbendingar eru um að þróunin á næsta ári verði óhagfelldari en frumvarpið gerir ráð fyrir.
- Forgangsraða ætti fjármunum í fjárfestingu og grunnþjónustu. Auka þarf fjárfestingar og því ættu stjórnvöld að skoða til hlítar kosti samvinnuleiðar (PPP).
- Tekjuskattsbreytingar ættu að stuðla að sátt og fagnar Viðskiptaráð öllum skattalækkunum en vekur athygli á að skattar á einstaklinga á Íslandi eru þeir næsthæstu meðal OECD ríkja.
- Grænir skattar til að sporna gegn loftslagsbreytingum ættu að vera tekjuhlutlausir fyrir ríkissjóð þannig að aðrir skattar lækki til mótvægis t.d. svo að áhrif skattana á mengun sé enn meiri.
- Stundum virðist sem áherslur þeirra sem fjalla um opinber fjármál séu ekki í takt við það sem er í húfi. Gott dæmi um slíkt ójafnvægi má finna í fjölmiðlaumfjöllun um veiðigjald sem skilar um 3% af því sem virðisaukaskattur skilar í ríkissjóð en samt virðist sem umfjöllun um veiðigjald sé jafnvel meiri.
Sjá nýlegar umsagnir Viðskiptaráðs um ríkisfjármál: Fjárlög 2019, frumvörp í tengslum við fjárlög 2019, fjármálaáætlun 2020-2024, breytingar á fjármálastefnu 2018-2020.