12.08.2019 | Umsagnir

Nútímalegri leigubílalöggjöf

Viðskiptaráð hefur tekið til umsagnar drög að frumvarpi til laga um leigubifreiðar. Ráðið fagnar markmiði laganna að auka frjálsræði á leigubifreiðamarkaði og að samkeppni sé efld með afnámi stöðvarskyldu leigubifreiðarstjóra og takmörkunum á fjölda atvinnuleyfa til leigubifreiðaaksturs, en slíkar breytingar eru löngu tímabærar.

Þó telur Viðskiptaráð mikilvægt að lagaumgjörðin þarf að vera skýr til þess að þjóna markmiði laganna um að opna leigubifreiðamarkaðinn og auka frjálsræði, en viss atriði í núverandi frumvarpi skapa ákveðinn vafa um hvort reglurnar auki í raun samkeppni á leigubifreiðamarkaði. Í því samhengi vill Viðskiptaráð koma á framfæri eftirfarandi atriðum:

  • Taka þarf allan vafa af skilyrði um að gjald fyrir leigubílaþjónustu sé fyrir fram ákveðið heildargjald svo unnt sé að þjóna því markmiði laganna að opna leigubílamarkað á Íslandi fyrir starfsemi farveitna.
  • Gæta þarf jafnræðis við veitingu atvinnuleyfis og tryggja að umsækjendum með annað móðurmál en íslensku sé kleift að sitja námskeið og þreyta próf.
  • Ef opna á leigubílamarkaðinn á Íslandi er mikilvægt að stíga skrefið til fulls og að aðgangshindranir séu ekki enn til staðar í formi íþyngjandi sérskilyrða líkt og sjá má dæmi um í frumvarpinu.

Lesa umsögn hér.

Viðfangsefni: Regluverk