Stjórnarhættir
Viðskiptaráð gefur út leiðbeiningar um stjórnarhætti fyrirtækja með það að leiðarljósi að stuðla að góðum stjórnarháttum. Leiðbeiningarnar skýra hlutverk og ábyrgð stjórnenda og treysta þannig hag eigenda og annarra haghafa.
Leiðbeiningar um stjórnarhætti fyrirtækja voru gefnar út í 6. útgáfu þann 2. febrúar 2021. Að þeim standa Viðskiptaráð, Samtök atvinnulífsins og Nasdaq Iceland, en leiðbeiningarnar eru nú uppfærðar frá 5. útgáfu sem hefur verið í gildi frá árinu 2015. Þónokkrar breytingar eru gerðar á leiðbeiningunum í 6. útgáfu, þótt megininntak þeirra sé hið sama og uppsetningin óbreytt.
Leiðbeiningunum er ætlað að nýtast sem verkfæri stjórna og stjórnenda til að mæta þeirri ábyrgð sem á þeim hvílir, en það er skoðun útgefenda að með því að fylgja góðum stjórnarháttum megi styrkja innviði fyrirtækja og efla almennt traust gagnvart viðskiptalífinu. Hvort tveggja skiptir sköpum fyrir samkeppnishæfni íslenskra fyrirtækja og æ fleiri fyrirtæki sjá sér hag í því að fara að leiðbeiningunum.
Viðskiptaráð gaf út fyrstu útgáfu leiðbeininganna árið 2004 með það markmið að fyrirtæki setji sér sjálf reglur varðandi stjórnarhætti í stað inngripa stjórnvalda. Síðan þá hafa leiðbeiningarnar fest sig í sessi í íslensku atvinnulífi, aðkoma að útgáfu þeirra verið breikkuð og þær endurskoðaðar með reglubundnum hætti.