Ísland fellur um sjö sæti milli ára í samkeppnishæfni og situr nú í 22. sæti af 70 ríkjum árið 2026. Samkeppnishæfni Íslands minnkar í öllum meginþáttum úttektar IMD háskólans í Sviss, sem framkvæmir árlega úttekt á samkeppnishæfni ríkja.
Starfshópur á vegum ríkisstjórnarinnar lagði til 57 hagræðingaraðgerðir vorið 2025, í kjölfar þess að ríkisstjórnin óskaði eftir hagræðingartillögum frá almenningi. Af 57 aðgerðum sem lagðar voru fram hafa 5 komið til framkvæmda, 20 eru í vinnslu, 6 áformaðar, en ekki er hafin vinna við 26. Mikilvægt er að ríkisstjórnin haldi áfram að rýna verkefni ríkisins og hrindi hagræðingaraðgerðum í framkvæmd.
Öryrkjum hefur fjölgað hratt frá aldamótum og er hlutfall þeirra nú með því hæsta á Norðurlöndum. Nýlegar breytingar á örorkubótakerfinu hafa dregið úr hvata til atvinnuþátttöku og einstaklingar geta nú verið betur settir fjárhagslega á bótum en í meðaltekjustörfum. Endurskoða ætti frítekjumörk og samspil örorkutengdra bóta svo skýrari hvati sé til þátttöku á vinnumarkaði.
Á Íslandi eru víða tækifæri til að auka samkeppni í sorpþjónustu heimila. Á stórum hluta markaðarins fer starfsemi fram án útboðs, sem getur leitt til hærri kostnaðar og lakari þjónustu. Með útvistun, skýrari ábyrgð og afmörkun verkefna sveitarfélaga má auka samkeppni og árangur í málaflokknum.
Hér getur þú skráð þig á póstlista Viðskiptaráðs
