Vel heppnaður Peningamálafundur Viðskiptaráðs

Áhugaverður fundur er að baki þar sem Már Guðmundsson seðlabankastjóri fór yfir árangur og áskoranir peningastefnunnar. Innflæðishöftin eru tæki sem Seðlabankinn sér fyrir sér að geta gripið til á komandi árum ef þörf er á með fljótandi gengi og verðbólgumarkmiði, þó markmiðið sé að lækka bindiskyldu niður í núll eins fljótt og auðið er. Ákall barst frá atvinnulífinu á fundinum um stöðugleika og fyrirsjáanleika í gengismálum. Rætt var um þann viðskiptakostnað sem fylgir krónunni, en seðlabankastjóri benti á að bankinn gæti ekki stýrt raungenginu, aðeins nafngengi. Hér þyrftu stjórnmálamenn að sjá að sér í atvinnustefnu.

Katrín Olga Jóhannesdóttir, formaður Viðskiptaráðs, benti á þá skemmtilegu tilviljun að fundinn bæri upp á dag íslenskrar tungu en íslenskan hefur varðveist og haldið sér í megin dráttum frá því að hér riðu hetjur um héruð. Velti hún því upp hvort það væri með þessum sömu augum sem við horfðum á íslensku krónuna?

„Er hún menningararfur og mikilvægur partur af sjálfstæði okkar Íslendinga eða er hún einungis mælieining, gjaldmiðlavog í viðskiptum og tæki til að geyma verðmæti? Svo ég vitni nú í Ragnar S. Halldórsson, forvera minn í starfi, sem spurði einmitt þeirrar spurningar í blaðagrein árið 1986 hvort sjálfstæði þjóðar felist í sjálfstæðri mynt, eigin gjaldmiðli? Og hvort það væri svik við landið að leggja til að íhuga upptöku annarrar myntar? Hann minnti á að þegar hér riðu hetjur um héruð, var notuð erlend mynt á Íslandi. Ekki að við séum að fara að boða upptöku annarrar myntar hér í dag heldur er ætlunin að fara yfir þá valkosti sem í boði eru þegar kemur peningamálum og rökræða það sem við vitum fyrir víst og hvað ekki.“

Hér má sjá myndir frá fundinum.

Viðskiptaráð þakkar seðlabankastjóra og pallborðsgestum kærlega fyrir góðan fund.

Staðan í þjóðarbúinu er góð. Minnkandi hagvöxtur er bæði óumflýjanlegur og æskilegur, segir Már Guðmundsson. #peningamálafundur
— Viðskiptaráð Íslands (@vidskiptarad) November 16, 2017

Már segir mjög erfitt að reka sjálstæða peningastefnu fyrir land eins Ísland ef allar fjármagnshreyfingar eru frjálsar. #peningamálafundur
— Viðskiptaráð Íslands (@vidskiptarad) November 16, 2017

“Við núverandi aðstæður má færa rök fyrir því að ávinningur þjóðarbúsins af því innflæði sem bindisskyldan takmarkar sé neikvæður” - Már Guðmundsson
— Viðskiptaráð Íslands (@vidskiptarad) November 16, 2017

Það þýðir ekki að setja peningastefnunni markmið sem hún hefur engin tæki til að ná segir Már. #peningamálafundur
— Viðskiptaráð Íslands (@vidskiptarad) November 16, 2017

Sjálfstæð peningastefna er ekki gallalaus og verður það aldrei. Það er engin ein lausn til í peningamálum. Mismunandi kostir þróast í tímanna rás. - Már Guðmundsson #peningamálafundur
— Viðskiptaráð Íslands (@vidskiptarad) November 16, 2017