Verðbólgulækkun á Peningamálafundi Viðskiptaráðs

Peningamálafundur Viðskiptaráðs fór fram þann 27. nóvember síðastliðinn, undir yfirskriftinni Vaxtaverkir og hagstjórn. Viðburðurinn hefur fest sig í sessi hjá fyrirtækjum og einstaklingum sem vilja hlýða á seðlabankastjóra fjalla um peningastefnu og efnahagsmál. Fjölmenni var á viðburðinum og gaman frá því að segja að tilkynnt var um lækkun verðbólgu á miðjum fundinum.

Andri Þór Guðmundsson, formaður Viðskiptaráðs, flutti opnunvarávarp og sagði að nýleg vaxtalækkun Seðlabankans væri lítið skref í rétta átt en að áföll í hagkerfinu hefðu kallað á hana. Andri gagnrýndi áframhaldandi hallarekstur ríkissjóðs og hvatti til aðhalds. „Sé einhvern tíma góður tími til að gera betur í ríkisrekstri, þá er sá tími núna. Við hvorki eigum né getum lifað á yfirdráttarheimildinni endalaust.“

Að venju var hápunktur fundarins erindi Ásgeirs Jónssonar seðlabankastjóra. Hann benti á að til að ná verðbólgu niður í átt að 2,5% verðbólgumarkmiði þurfi að hægja á efnahagslífinu og kæla vinnumarkaðinn. Það sé nú þegar að raungerast. Á meðan Ásgeir flutti erindi sitt var tilkynnt um lækkun á verðbólgu úr 4,3% niður í 3,7%.

Í kjölfarið fóru fram líflegar pallborðsumræður. Þar tóku þátt Daði Már Kristófersson, fjármála- og efnahagsráðherra, Jón Guðni Ómarsson, bankastjóri Íslandsbanka, Rannveig Eir Einarsdóttir, framkvæmdastjóri Reir verk, Þórarinn G. Pétursson, varaseðlabankastjóri og Þórður Pálsson, forstöðumaður fjárfestinga hjá Sjóvá.

Myndir frá viðburðinum má sjá hér.

Hljóðpptaka frá fundinum er aðgengileg fyrir starfsfólk hjá aðildarfélögum Viðskiptaráðs. Innskráning fer fram með því að nota starfsmannanetfang hjá fyrirtæki sem er í aðild að Viðskiptaráði.