Greiðsludreifing aðflutnings- og vörugjalda framlengd út árið

Á þriðjudaginn síðasta samþykkti Alþingi breytingar á lögum til að opna fyrir greiðsludreifingu aðflutnings- og vörugjalda út árið. Lögin eru hluti af aðgerðum stjórnvalda í tengslum við nýgerða kjarasamninga. Þau taka til allra uppgjörstímabila ársins og fari fyrirtæki fram á dreifingu skerðir það ekki heimild þeirra til að færa til innskatts allan virðisaukaskatt viðkomandi tímabils, þó einungis hluti hans hafi verið greiddur.

Samkvæmt lögunum skal:

• Helmingi af aðflutningsgjöldum á viðkomandi uppgjörstímabili skilað eigi síðar en á 15. degi næsta mánaðar eftir lok uppgjörstímabils.
• Helmingi af vörugjöldum á viðkomandi uppgjörstímabili skilað eigi síðar en á 28. degi annars mánaðar eftir lok uppgjörstímabils.

Viðskiptaráð hefur síðustu misseri ítrekað óskað eftir því við ráðuneyti og Alþingi að greiðsludreifing áðurnefndra gjalda verði framlengd. Því fagnar ráðið þessari viðleitni stjórnvalda til að létta undir með innflutningsaðilum enda hefur þetta úrræði skipt þá miklu. Eins og þó hefur komið fram hjá efnahags- og skattanefnd þá er ekki ætlunin að úrræði sem þessi standi lengur en þörf er á. Það er því tilefni til að fyrirtæki geri ráð fyrir að hefðbundin greiðsla aðflutnings- og vörugjalda taki við frá og með áramótum. Það er þó von ráðsins að efnahagslegur bati muni eflast á komandi mánuðum svo fyrirtæki hafi ekki þörf á úrræðum í þessa veru þegar nýtt ár gengur í garð.

Tengt efni:

• Í síðasta sinn: greiðsludreifing aðflutnings- og vörugjalda (mars 2011)
• Ekki frekari greiðsludreifing aðflutnings- og vörugjalda (mars 2011)
• Greiðsludreifing opinberra gjalda ekki lengur í boði (júlí 2010)
• Greiðsludreifing og frestur til greiðsluuppgjörs á opinberum gjöldum (mars 2010)
• Hagsmunamál fyrirtækja í forgrunni (janúar 2010)