Áfram óvissa um gjaldeyrismál

Staðan á gjaldeyrismarkaði hefur lítið breyst undanfarna daga og vikur. Gjaldeyristemprun Seðlabankans er enn við lýði og þrátt fyrir að viðskiptabankarnir þrír hafi nýlega eignast sína eigin gjaldeyrisreikninga hjá JP Morgan geta þeir enn ekki sinnt erlendri greiðslumiðlun á eigin spýtur.

Ýmislegt bendir til þess að krónunni verði fleytt von bráðar, jafnvel á allra næstu dögum. Þó hafa enn ekki fengist haldbærar upplýsingar um það með hvaða hætti það verður gert og því lítið hægt að segja til um líklega þróun á gjaldeyrismarkaði á næstunni. Í öllu falli er ljóst að enn ríkir mikið óvissuástand á gjaldeyrismarkaði. Brýnt er að úr þessu verði greitt eins fljótt og auðið er.