Innan vébanda Viðskiptaráðs starfar sjálfstæð gerðardómsstofnun. Með notkun Gerðardóms Viðskiptaráðs Íslands geta aðilar fengið leyst úr ágreiningi með skjótum hætti, hjá hlutlausum aðila, í fullum trúnaði.

Gerðardómur

Hjá Gerðardómi Viðskiptaráðs Íslands fæst hröð úrlausn ágreiningsmála, en reglur Gerðardómsins kveða á um endanlega úrlausn innan sex mánaða, nema aðilar semji um annað

Trúnaður gildir um gerðarmeðferðina og úrskurðir eru ekki birtir opinberlega

Sérhæfðir dómendur leysa úr ágreiningi aðila 

Heimilt er að leiða sérfræðivitni fyrir gerðardóminn

Aðilar að samningi geta komið sér saman um að ágreiningsmál sem upp koma þeirra á milli verði leyst fyrir gerðardómi í stað almennra dómstóla. Ágreiningurinn er þá leystur fyrir sjálfstæðum og hlutlausum gerðardómi, en aðilar hafa möguleika á að tilnefna gerðardómara sem eru í kjölfarið staðfestir af stjórn GVÍ. Kostir gerðarmeðferðar eru almennt taldir vera styttri málsmeðferðartími, trúnaður sem gildir um málsmeðferðina og víðtækt málsforræði aðila yfir málsmeðferðinni.  Úrlausn gerðardóms er endanlega bindandi fyrir aðila og er auðvelt að fullnusta úrlausnir gerðardóma um nær allan heim. 

Málsmeðferð fyrir dómstólum getur tekið langan tíma, með tilheyrandi kostnaði. Á móti kemur liggur úrlausn gerðardóms almennt fyrir innan sex mánaða frá því að mál hefst og er sú úrlausn endanleg, þannig að ekki er hægt að áfrýja henni til æðra dómstigs, sem felur í sér ákveðið hagræði. Sé ágreiningsefnið eða þeir hagsmunir sem eru í húfi þess eðlis að mikilvægt sé að fá skjóta úrlausn getur því verið mun hentugra að leita til gerðardóms með ágreininginn. 

Trúnaður gerðarmeðferðar aðgreinir hana einnig skýrlega frá málsmeðferð fyrir dómstólum, en trúnaður gildir um gerðarmeðferðina og úrskurðir eru ekki birtir opinberlega nema aðilar semji um slíkt, ólíkt því sem gengur og gerist fyrir almennum dómstólum. Málsmeðferðin býður þar að auki upp á meiri sveigjanleika. Aðilar geta til að mynda samið um gagnaframlagningu og sönnunarfærslu, ásamt því að tilnefna gerðarmann og síðast en ekki síst leiða sérfræðivitni fyrir gerðardóminn. 

Úrskurður gerðardómsins er endanlegur og bindandi fyrir málsaðila.  Úrskurður gerðardómsins er jafnframt aðfararhæfur í 157 löndum, þar sem  Ísland er aðili að New York samningnum  um viðurkenningu og fullnustu erlendra gerðardómsúrskurða. 

Ítarefni

Gerðardómur Viðskiptaráðs Íslands (GVÍ) er sjálfstæð gerðardómsstofnun sem hefur umsjón með úrlausn ágreiningsmála. GVÍ heyrir undir Viðskiptaráð Íslands, en er sjálfstæður í starfsemi sinni hvað varðar umsjón með ágreiningsmálum. GVÍ samanstendur af stjórn og skrifstofu. 

GVÍ er ekki úrlausnaraðili og leysir ekki úr ágreiningsmálum. 

Hlutverk og verkefni GVÍ eru meðal annars:

umsjón með innlendum og alþjóðlegum ágreiningsmálum 

skipun gerðarmanna að beiðni málsaðila

að standa og beita sér fyrir kynningu og upplýsingagjöf um málefni sem tengjast gerðarmeðferð og gerðardómsrétti

Nánari upplýsingar um gerðardóminn eru gefnar á skrifstofu Viðskiptaráðs Íslands. Skrifstofan hefur jafnframt milligöngu um samband við stjórn dómsins og tekur á móti beiðnum um gerðarmeðferð. 

Stjórn Gerðardóms Viðskiptaráðs Íslands 

Í stjórn gerðardómsins sitja: Agla Eir Vilhjálmsdóttir, Finnur Magnússon, Garðar Víðir Gunnarsson, Halla Björgvinsdóttir og Haraldur Ingi Birgisson. 

Um GVÍ

Stjórn Gerðardóms Viðskiptaráðs Íslands

Framkvæmdastjóri Gerðardóms Viðskiptaráðs Íslands

Gerðardómur

Gerðardómur

Aðalvamynd

Málefnastarf

Þjónusta

Um okkur