Virðisaukaskattsumhverfi íþróttahreyfingarinnar

Viðskiptaráð Íslands hefur skilað umsögn til efnahags- og viðskiptanefndar vegna tillögu til þingsályktunar um endurskoðun á virðisaukaskattsumhverfi íþróttahreyfingarinnar.

Í tillögunni er lagt til að íþrótta- og ungmennafélög verði undanþegin virðisaukaskatti af starfsemi sinni og þau fái endurgreiddan virðisaukaskatt af byggingu íþróttamannvirkja á íþróttasvæðum sínum, vinnulaunum og efniskaupum.

Í umsögn Viðskiptaráðs um tillöguna kemur fram að ráðið telji nauðsynlegt að einfalda skattkerfið og auka skilvirkni þess með því að breikka skattstofn virðisaukaskatts með afnámi undanþága og sameiningu skattþrepa. Viðskiptaráð fagnar því að fjármála- og efnahagsráðherra hafi nú skipað stýrihóp sem vinnur að endurskoðun á vörugjöldum og virðisaukaskatti. Að mati ráðsins ætti að líta heildstætt á virðisaukaskattkerfið við þessa endurskoðun. Því ætti ekki að undanskilja íþrótta- og ungmennafélög, eða aðra hópa, þegar stefnt er að einföldun kerfisins. Leggur ráðið því til að tillagan nái ekki fram að ganga.

Umsögn Viðskiptaráðs í heild má nálgast hér.