Tekist á um réttarvernd ríkisstarfsmanna á hátíðarmálþingi Úlfljóts

Miðvikudaginn 22. október tók Lísbet Sigurðardóttir þátt í hátíðarmálþingi Úlfljóts sem laganemar við Háskóla Íslands standa að. Réttarvernd starfsmanna ríkisins var til umfjöllunar á málþinginu. Auk Lísbetar tóku til máls Ögmundur Jónasson, fv. ráðherra og fv. formaður BSRB, og Reimar Pétursson, lögmaður hjá LLG lögmönnum.

Lísbet vitnaði í kynningu sinni í nýlegar útgáfur Viðskiptaráðs er snúa að sérréttinum opinberra starfsmanna og ríkri uppsagnarvernd þeirra. Viðskiptaráð hefur lagt til afnám áminningarskyldu opinberra starfsmanna og hefur fjármálaráðherra birt áform þess efnis í samráðsgátt. Eins og við var að búast voru skiptar skoðanir og sköpuðust líflegar umræður.

Sjá upptöku frá viðburðinum

Í kynningu sinni benti Lísbet á að almenningur sé sammála því að færa eigi uppsagnarvernd opinberra starfsmanna nær almennum vinnumarkaði. Niðurstöður þátttakenda í kosningaprófi sem Viðskiptaráð lagði fyrir almenning í aðdraganda Alþingiskosninga 2024 sýndu að 70% almennings eru fylgjandi því að færa réttindi opinberra starfsmanna nær því sem tíðkast á almennum vinnumarkaði.

Lísbet dró saman tillögur Viðskiptaráðs sem eru eftirfarandi:

1. Afnám áminningarskyldu: Viðskiptaráð leggur til að ákvæði um áminningar verði fellt á brott úr lögum um réttindi og skyldur starfs­manna ríkisins. Ákvæðið gerir hvorki greinarmun á því hvort starfs­mann skorti getu eða vilja til þess að sinna starfi sínu. Fyrir­komulagið er verulega hamlandi á kostnað sveigjanleika og skilvirkni. Að mati Viðskiptaráðs er óþarfi að binda í lög með hvaða hætti yfirmaður eigi að taka á því þegar starfsmaður sinnir starfi sínu með ófullnægjandi hætti.
2. Afnám stjórnsýsluverndar: Viðskiptaráð leggur til að ákvarðanir um starfslok falli ekki undir ákvæði og málsmeðferðarreglur stjórn­sýslulaga að embættismönnum og æðstu stjórnendum hins opinbera undanskildum. Sá hópur telur einungis um 4% opinberra starfs­manna.

Glærukynningu Lísbetar í heild sinni má nálgast hér.