Sykurskattur óskilvirkt neyslustýringartæki

Viðskiptaráð hefur tekið til umsagnar drög að tillögu til þingsályktunar um aðgerðaáætlun um málefni offitu, sem birt var í samráðsgátt stjórnvalda þann 11. febrúar síðastliðinn.

Viðskiptaráð telur brýnt að vara við því að gripið verði til sértækrar skattlagningar á tilteknar matvörur, svo sem sykurskatts, líkt og velt er upp í fyrstu aðgerð í drögunum. Slík skattlagning er óhentugt stjórntæki og felur einnig í sér aukna neyslustýringu, sem dregur úr velferð neytenda.

Reynsla erlendis sýnir einnig að áhrif slíkra skatta á neyslumynstur og heilsufarslegar útkomur séu takmörkuð. Neysla getur færst yfir í aðrar óhollar vörur sem ekki falla undir skattinn, án þess að heildarneysla eða heilsufarsáhætta minnki. Á sama tíma auka sértækir skattar flækjustig og kostnað í skatta- og regluumhverfi fyrirtækja. Skattkerfið ætti fyrst og fremst að þjóna sem tekjuöflun fyrir nauðsynleg verkefni ríkisins, en ekki vera nýtt sem óskilvirkt neyslustýringartæki.

Viðskiptaráð telur mikilvægt að áhersla verði lögð á jákvæða hvata, fræðslu og almennar aðgerðir sem styðja heilbrigðar lífsvenjur, fremur en sértækar álögur á einstaka vöruflokka sem bitna á samfélaginu í heild en ekki aðeins þeim hópi sem þær miðast að. Ákvarðanir um hagræna hvata ættu ætíð að byggjast á traustum gögnum, heildstæðu mati á áhrifum og skýrri kostnaðar- og ábatagreiningu.

Lesa má umsögnina í heild sinni hér.