Skýrsla Viðskiptaþings 2022

Samhliða Viðskiptaþingi sem nú er hafið á Hilton Reykjavík Nordica hefur Viðskiptaráð gefið út skýrsluna Tímarnir breytast og vinnan með - Vatnaskil á vinnumarkaði.

Í skýrslunni er stiklað á stóru um þau vatnaskil sem eru að verða á vinnumarkaðnum um þessar mundir. Áhrifaþættir umbreytinganna eru skoðaðar í kjölinn og lagðar fram tillögur til úrbóta.

Tillögur Viðskiptaráðs

• Liðkað verði fyrir komu erlends vinnuafls með einfaldara og hraðara umsóknarferli
• Alþjóðlegt nám verði eflt á öllum skólastigum og erlendum nemum fjölgað
• Mörkuð verði stefna um sjálfvirknivæðingu og viðbrögð til að sporna við brottfalli af vinnumarkaði
• Kulnun í starfi verði betur skilgreind og aðgerðaáætlun sett fram til að fækka tilfellum og takast á við kulnun
• Stuðlað verði að aukinni sí- og endurmenntun, með áherslu á fólk í störfum sem eru berskjölduð fyrir sjálfvirknivæðingu
• Tengsl atvinnulífs og menntakerfis verði styrkt á öllum skólastigum
• Stuðlað verði að auknum áhuga á STEAM-greinum með markvissum kynningum á námi og störfum fyrir grunn- og framhaldsskólanema
• Fjármögnun háskóla taki mið af frammistöðu nemenda og árangri brautskráðra á vinnumarkaði
• Skapaðir verði hvatar fyrir skóla til að leggja aukna áherslu á STEAM-greinar
• Fyrirtæki setji sér formlega fjarvinnustefnu
• Fyrirtæki vinni markvisst að uppbyggingu og nýtingu styrkleika hvers starfsmanns, til að mynda með starfsþróunarsamtölum
• Hið opinbera nýti sér stafrænar lausnir til að sjálfvirknivæða störf þar sem kostur er og dragi úr fjölgun opinberra starfsmanna
• Hið opinbera leiði ekki launahækkanir, heldur almenni vinnumarkaðurinn
• Réttindi opinberra starfsmanna verði færð til samræmis við almenna vinnumarkaðinn
• Launahækkanir fari ekki umfram svigrúm

Lesa skýrslu