Viðmið DORA verði skýr og fyrirsjáanleg

Viðskiptaráð hefur tekið til umsagnar drög að reglugerð um gildistöku reglugerða ESB um stafrænan viðnámsþrótt fjármálamarkaðar. Með reglugerðinni verða innleiddar tvær framseldar reglugerðir framkvæmdastjórnarinnar (ESB) sem varða útnefningu mikilvægra þriðju aðila sem veita upplýsinga- og fjarskiptatækniþjónustu.

Ráðið gerir ekki athugasemdir við innleiðingu ofangreindra reglugerða en brýnir fyrir stjórnvöldum að ekki verði gengið lengra en lágmarkskrafa kveður á um hvort heldur er varðar gildissvið eða túlkun þeirra í íslenskum rétti. Að mati ráðsins er hætt við að óvissa geti skapast um hugtakið mikilvæga þriðju aðila samkvæmt DORA og framseldri reglugerð (ESB) 2024/1502.

Verði innlendur þjónustuveitandi útnefndur sem mikilvægur þriðji aðili fellur hann undir sérstakan eftirlitsramma samkvæmt DORA þar sem Eftirlitsstofnun EFTA fer með hlutverk aðaleftirlitsaðila. Slík útnefning hefur í för með sér víðtækar skyldur, meðal annars upplýsingaskyldu, samstarf við eftirlitsaðila, heimildir til úttekta og rannsókna auk greiðslu eftirlitsgjalda samkvæmt hinni framseldu reglugerð.

Viðskiptaráð bendir á að þessar skyldur bætast við þann kostnað og þá reglubyrði sem innleiðing DORA hefur þegar haft í för með sér fyrir fyrirtæki sem veita upplýsinga- og fjarskiptatækniþjónustu til fjármálafyrirtækja. Ljóst er að falli fyrirtæki undir eftirlitsramma reglugerðarinnar getur það haft veruleg fjárhagsleg og rekstrarleg áhrif. Af þeim sökum er mikilvægt að útnefningarviðmiðin séu skýr, fyrirsjáanleg og túlkuð í samræmi við markmið DORA um að eftirlitið taki aðeins til þjónustuveitenda sem hafa raunverulega kerfislega þýðingu fyrir evrópskan fjármálamarkað.

Þótt fram komi í greinargerð með drögunum að ekki sé talið líklegt að íslenskir þjónustuveitendur falli undir eftirlitsrammann á næstunni er óvíst hvernig útnefningarviðmiðin kunna að verða túlkuð í framkvæmd. Fyrirsjáanleiki um beitingu þeirra skiptir miklu máli, enda getur óvissa um hugsanlega útnefningu haft áhrif á rekstrarákvarðanir og aukið reglubyrði fyrirtækja. Að mati Viðskiptaráðs er brýnt að við mat á því hvort þjónustuveitandi teljist mikilvægur þriðji aðili verði litið til eðlis og umfangs starfsemi viðkomandi félags og kerfislegs mikilvægis þeirrar þjónustu sem það veitir, fremur en stærð eða veltu alþjóðlegra samstæðna sem íslensk fyrirtæki kunna að tilheyra.

Viðskiptaráð hvetur því til þess að stjórnvöld skýri, eftir því sem kostur er, hvernig útnefningarviðmiðum hinnar framseldu reglugerðar verður beitt gagnvart innlendum aðilum. Með því mætti draga úr þeirri óvissu sem felst í innleiðingu reglugerðarinnar.