Viðskiptaráð fagnar mikilvægum skrefum stjórnvalda

Viðskiptaráð fagnar samkomulagi Seðlabanka Íslands við Seðlabanka Svíþjóðar, Noregs og Danmerkur. Tvíhliða gjaldeyrisskiptasamningar sem þessi eru mikilvægt fyrsta skref í eflingu trúverðugleika Seðlabanka Íslands og íslenska hagkerfisins. Enn fremur fagnar Viðskiptaráð þeirri tilkynningu að enn frekar verði aukið við aðgang bankans að erlendu lausafé í náinni framtíð.

Vöxtur íslenska bankakerfisins hefur verið mikill og hraður undanfarin ár og því afar mikilvægt að innviðir og stofnanaumgjörð hérlendis taki mið af því. Í kjölfar aukinna lánalína telur Viðskiptaráð skynsamlegt að ríkissjóður leitist eftir erlendri lántöku í samstarfi við Seðlabanka Íslands til að auka gjaldeyrisforða verulega og stórefla styrk Seðlabanka Íslands.

Aðgerðir sem þessar eru ekki einungis mikilvægar til að efla traust á íslenskum fjármálafyrirtækjum heldur einnig hagkerfinu öllu. Þetta er því nauðsynlegt skref í baráttunni gegn verðbólgu og ætti að gera Seðlabanka Íslands kleift að lækka vexti fyrr og hraðar en ella.

Enn fremur fagnar Viðskiptaráð tilkynningu Geirs H. Haarde forsætisráðherra um fyrirhugaðar breytingar á og umbætur á skipulagi Íbúðalánasjóðs. Ráðið tekur undir þau orð forsætisráðherra að með því sé hægt að bæta virkni peningastefnunnar til muna og þar með styrkja framtíðargrundvöll íslensku krónunnar.