Heimsókn frá Kanaríeyjum

Sendinefnd frá Kanaríeyjum er nú stödd á Íslandi á vegum Spánsk–íslenska viðskiptaráðsins. Í sendinefndinni eru meðlimir í Viðskiptaráði Gran Canaria, ráðherrar úr heimastjórn eyjunnar og forsvarsfólk ýmissa fyrirtækja sem hafa höfuðstöðvar á Gran Canaria. Tilgangur komu sendinefndarinnar er að fræðast um stafræna þróun og viðskipti íslenskra fyrirtækja auk þess að efla samstarf milli landanna.

Í tilefni komu sendinefndarinnar bauð Spánsk-íslenska viðskiptaráðið til fundar í Húsi atvinnulífsins í morgun þar sem Konráð Guðjónsson, aðstoðarframkvæmdastjóri og hagfræðingur Viðskiptaráðs, Ágúst Elvar Bjarnason, verkefnastjóri hjá SAF, Andri Kristjánsson, framkvæmdastjóri Stafræns Íslands og Þorbjörg Helga Vigfúsdóttir, stofnandi Trappa og Kara Connect, héldu erindi, auk þeirra Elena Máñez, ráðherra efnhags- og atvinnumála, og Yaiza Castilla, ráðherra ferðamála, nýsköpunar og viðskipta.

Í lok fundarins skrifuðu svo Ari Fenger, formaður Viðskiptaráðs Íslands og Santiago de Armas, varaformaður Viðskiptaráðs Gran Canaria undir viljayfirlýsingu um samstarf ráðanna tveggja.

Viðskiptaráð Íslands og Spánsk-íslenska viðskiptaráðið þakka sendinefndinni kærlega fyrir komuna og óska gestunum góðrar og árangursríkrar dvalar á Íslandi.