Árni og Hildur nýir heiðursfélagar Viðskiptaráðs

Á Viðskiptaþingi var tilkynnt um skipan tveggja nýrra heiðursfélaga Viðskiptaráðs, en að þessu sinni hljóta nafnbótina tveir einstaklingar sem hafa lagt sín lóð á vogarskálar, hvort tveggja til viðskiptafrelsis og framfara og til Viðskiptaráðs í gegnum tíðina, þau Árni Árnason og Hildur Petersen.

Samkvæmt 27. gr. laga Viðskiptaráðs er stjórn ráðsins heimilt að skipa heiðursfélaga Viðskiptaráðs Íslands. Til þeirrar nafnbótar geta þeir unnið sem hafa lagt sérstaklega mikið af mörkum í þágu viðskiptafrelsis og framfara í atvinnulífinu.

Árni Árnason

Árni hefur verið virkur í íslensku viðskiptalífi um áratugaskeið. Hann var hagfræðingur Viðskiptaráðs frá 1974-1979, þá Verzlunarráðs, og framkvæmdastjóri Viðskiptaráðs frá 1979 til 1987. Eftir farsælan feril sinn innan Viðskiptaráðs hefur hann gengt ýmsum trúnaðarstörfum innan ráðsins, þ.á.m. í kjörnefnd ráðsins. Árni hefur verið framkvæmdastjóri Árvíkur frá árinu 1991.

Hildur Petersen

Hildur er frumkvöðull á ýmsum sviðum og hóf þátttöku í viðskiptalífinu árið 1978. Hún stýrði ljósmyndafyrirtækinu Hans Petersen í rúm tuttugu ár, var stjórnarformaður SPRON og ÁTVR. Hún er fyrsta konan sem var kjörin í stjórn Viðskiptaráðs árið 1990, fyrsta konan í stjórn banka árið 1987 og fyrsta konan á Íslandi til að skrá fyrirtæki á verðbréfamarkað árið 1999.

Viðskiptaráð óskar nýjum heiðursfélögum ráðsins til hamingju með nafnbótina.