Ragnar ræddi stöðu RÚV og fjölmiðlamarkaðarins í Spursmálum

Ragnar Sigurður Kristjánsson, hagfræðingur Viðskiptaráðs, var gestur í Spursmálum á mbl.is síðastliðinn föstudag. Hann ræddi stöðuna á fjölmiðlamarkaðnum ásamt Páli Ásgrímssyni, aðallögfræðingi Sýnar.

Ragnar sagði rót vandans á fjölmiðlamarkaði vera skekkjuna sem staða RÚV skapar. RÚV er eini ríkismiðill Norðurlanda sem bæði fær opinber framlög og selur auglýsingar. Hlutdeild RÚV í tekjum á fjölmiðlamarkaði er 27%, en meðaltalið á Norðurlöndunum er 10%.

Í þættinum fjallaði Ragnar um þær fyrirhuguðu breytingar sem gera á á stuðningi við einkarekna fjölmiðla og það óheilbrigða samband sem slíkt fyrirkomulag skapar. Jafnframt benti hann á að stuðningskerfinu hefði aldrei verið ætlað að vera varanlegt og það væri plástur á stærra vandamál. Í því samhengi benti Ragnar á tillögur Viðskiptaráðs um afnám þessa stuðnings samhliða brotthvarfi RÚV af auglýsingamarkaðnum, en það væri liður í að leiðrétta samkeppnisstöðuna á fjölmiðlamarkaði.

Þáttinn má sjá í heild á mbl.is og stutt myndskeið úr honum má sjá hér fyrir neðan.