Einfaldara Ísland - veitingahúsarekstur og skrifræði

Viðskiptaráð Íslands fagnar ummælum forsætisráðherra um átakið Einfaldara Ísland í stefnuræðu hans á Alþingi. Í máli forsætisráðherra kom fram að hann muni beita sér fyrir því að ráðuneyti fari yfir lög og reglur í því augnamiði að auka skilvirkni og draga úr regluvirki stjórnsýslunnar.

Hugmyndir forsætisráðherra eru góðra gjalda verðar og ríma vel við boðskap Viðskiptaráðs sem hefur um árabil bent á að sóknarfæri séu á ótal sviðum ríkisbúskapsins. Sér í lagi hefur VÍ lagt áherslu á að einfalda regluverk um fyrirtækjarekstur í landinu — enda eigi Ísland að nýta möguleika mikillar nálægðar í litlu samfélagi til að draga úr skrifræði og auka skilvirkni opinberra stofnana.

VÍ hefur lagt áherslu á að einfalda skattaumverfi á Íslandi og mun t.a.m. halda alþjóðlega ráðstefnu um 15% landið Ísland þann 20. október n.k. Að sama skapi hefur ráðið lýst yfir áhyggjum sínum af miklu skrifræði í stjórnsýslunni, t.a.m. í kringum veitingahúsarekstur, eins og lesa má um í skoðun ráðsins um veitingahúsarekstur og skrifræði.

Ýmislegt hefur áunnist á síðustu árum, t.d. með rafrænum skilum á skattskýrslum — en betur má ef duga skal. Einfaldleikinn er kominn til að vera.

Halldór Benjamín Þorbergsson,
hagfræðingur Viðskiptaráðs.