Viðskiptaspjall við Magnús Sverri

Fyrsti gestur vetrarins í Viðskiptaspjalli Kjarvals, FVH og Viðskiptaráðs er Magnús Sverrir Þorsteinsson, forstjóri og einn eigenda Blue Car Rental. Viðburðurinn fer fram á Vinnustofu Kjarvals þann 6. október næstkomandi og hefst kl. 17:00.

Magnús hóf rekstur ungur með aðeins fimm bíla. Í dag stýrir hann einni stærstu bílaleigu landsins með yfir tvö þúsund bíla í flotanum og sinnir samhliða öðrum fjárfestingum.

Magnús hefur lýst sjálfum sér sem góðum í mörgu en frábærum í engu. Hann er stoltur af því að hafa greitt háa skatta í gegnum tíðina. Þá hefur hann vakið athygli á landsvísu sem einn forsvarsmanna Góðgerðafestar Blue Car Rental, sem hefur safnað yfir 100 milljónum króna á síðustu fimm árum.

Í spjallinu verður farið yfir ferilinn, hraðan vöxt fyrirtækisins, áskoranir í ferðaþjónustu, fótbolta, Góðgerðafest og margt fleira.

Aðgangur er ókeypis fyrir félagsmenn FVH, aðildarfélög Viðskiptaráðs og meðlimi Kjarvals.