Fyrirtækin á beinu brautina

Á föstudag fór fram opinn fundur á Grand Hótel þar sem samkomulag um úrvinnslu skuldamála lítilla og meðalstórra fyrirtækja var kynnt stjórnendum. Árni Páll Árnason, efnahags- og viðskiptaráðherra kynnti samkomulagið en í máli hans kom m.a. fram að það myndi stuðla að hraðari úrlausn skuldamála fyrirtækja. „Nú þurfa fyrirtæki ekki að velta því fyrir sér að eitthvað betra sé handan við hornið“ - lausnin er komin og því mikilvægt fyrir viðeigandi fyrirtæki að hafa samband við sinn viðskiptabanka sem fyrst til að koma málum sínum í ferli.

Hann undirstrikaði mikilvægi þess að hér væri umhverfi til verðmætasköpunar sem skapi jafnframt ný tækifæri. Að lokum minnti hann á að þrátt fyrir áföll síðustu þurfum við „á því að halda að eiga atvinnulíf sem er til í að taka áhættu“ en tók ennfremur fram að áhættu fylgir ábyrgð. Einnig fluttu framsöguerindi þau Vilhjálmur Egilsson, framkvæmdastjóri Samtaka atvinnulífsins, og Björk Þórarinsdóttir hjá Arion banka.

• Glærur Vilhjálms & glærur Bjarkar

Viðskiptaráð hefur opnað upplýsingavef um samkomulagið
Á upplýsingavef Viðskiptaráðs er að finna spurningar og svör tengd samkomulaginu. Fyrirtæki eru hvött til að kynna sér efni þess og leita til síns fjármálafyrirtækis eftir nánari upplýsingum og endurskipulagningu á grunni samkomulagsins.

Á síðunni eru tilgreind fyrirtæki innan vébanda Viðskiptaráðs sem hafa lýst sig reiðubúin til að aðstoða í þeirri umleitan. Tengiliði innan fyrirtækjanna og símanúmer þeirra má finna á upplýsingavefnum. Sjá hér: www.vi.is/beinabrautin