Árétting frá Viðskiptaráði Íslands - Fremstir í víglínu undanskildir

Viðskiptaráð Íslands áréttar umsagnarskrif sín vegna fjáraukalaga fyrr í vikunni. Þar kemur fram að með yfirvofandi efnahagskreppu vegna COVID-19 muni flestar atvinnugreinar verða fyrir höggi og jafnvel algjöru tekjuhruni sem leitt getur til uppsagna og kjararýrnunar. Staða efnahagsmála hér og í heiminum öllum er líklega mun alvarlegri en við gerum okkur grein fyrir. Fjöldi atvinnulausra skaust upp um rúmar þrjár milljónir á einni viku í Bandaríkjunum, Alþjóðagjaldeyrissjóðurinn boðar alheimskreppu – verri en þá síðustu. Vísitölur og mælikvarðar sýna þróun sem á sér enga hliðstæðu í sögu efnahagsmála. Þegar þetta er skrifað hafa 14.000 manns á almennum vinnumarkaði á Íslandi sótt um lækkað starfshlutfall á aðeins tveimur dögum, tekið þannig á sig kjararýrnun, þrátt fyrir atvinnuleysisbætur sem vissulega hjálpa til. Við blasir að fjölga mun í þessum hópi, ásamt því að fjöldi fólks á almennum vinnumarkaði missir alfarið vinnuna. Höggið verður vonandi tímabundið og líður hjá sem fyrst en engu að síður er eðlilegt að allir taki þátt í því að einhverju marki. Viðskiptaráð saknar þess þannig að sjá ekki hagræðingar hjá hinu opinbera þar sem því verður við komið.

Í umsögn Viðskiptaráðs þar sem nefnd er sú hugmynd að opinberir starfsmenn taki á sig sams konar skerðingar á starfshlutfalli og nú er að gerast á almennum markaði, kemur skýrt fram að þeir sem í fremstu víglínu standa í baráttunni gegn COVID-19 eigi að sjálfsögðu að vera undanskildir í slíkum hagræðingaraðgerðum.