Fjármálaráðherra ekki svarað erindi Viðskiptaráðs ári síðar

Fyrir ári síðan sendi Viðskiptaráð bréf til fjármálaráðherra í kjölfar Skattadagsins 2025. Í erindi á deginum var vakin athygli á misbresti við skattlagningu fjárfestinga fyrirtækja í verðbréfasjóðum og lagðar fram tillögur til úrbóta. Um er að ræða skattlagningu á óinnleystan hagnað hlutdeildarskírteina fyrirtækja sem síðan er aftur skattlagður við innlausn.

Þegar óinnleystur hagnaður er skattlagður á þennan máta getur það þýtt að fyrirtæki selji hlutdeildarskírteini sín einfaldlega því þau hafa ekki fjármagn til að greiða skattinn af þeim. Slík tvísköttun fælir fyrirtæki frá fjárfestingum í verðbréfasjóðum og gerir slíkar fjárfestingar óstöðugri, með minni sérhæfingu og áhættudreifingu. Þannig stuðlar skatturinn að verri nýtingu fjármagns en ella. Um er að ræða hagsmunamál fyrir Ísland en óskilvirk miðlun fjármagns fælir frá fjárfesta og veikir samkeppnishæfni landsins.

Ráðherra hefur ekki svarað erindinu ári síðar þrátt fyrir ítrekun. Viðskiptaráð gerir athugasemd við þessi vinnubrögð og telur þau ekki í samræmi við góða stjórnsýsluhætti. Ráðið skorar á ráðherrann að svara erindinu um hvort ráðherrann hyggist taka það til skoðunar og/eða taki afstöðu til þeirra tillagna sem þar koma fram.