Samþykktum endurgreiðslum hjá Rannís fækkar verulega milli ára
Rannís hefur ekki samþykkt færri umsóknir um endurgreiðslur til fyrirtækja vegna rannsókna og þróunar í áratug en á árinu 2024 auk þess sem hlutfall samþykktra umsókna hríðféll milli ára.
Samþykktar umsóknir fyrirtækja til Rannís um endurgreiðslur vegna rannsókna og þróunar hafa hríðfallið milli ára en aðeins 61% umsókna hlutu samþykkt vegna verkefna fyrir árið 2024. Samþykktarhlutfall féll um 21 prósentustig milli ára (mynd 1) en samhliða hafa útgjöld fyrirtækja vegna rannsókna og þróunar dregist saman úr 1,99% af VLF árið 2023 í 1,77% árið 2024.[1]
Þar sem hvergi eru aðgengilegar upplýsingar um stöðu umsókna hjá Rannís með opinberum hætti beindi Viðskiptaráð fyrirspurnum til stofnunarinnar varðandi fjölda umsókna og hlutfall samþykktra umsókna um endurgreiðslu verkefna vegna rannsókna og þróunar samanborið við undanfarin 10 ár. Ekki reyndist unnt að veita upplýsingar fyrir árið 2025 þar sem enn er unnið að afgreiðslu umsókna fyrir það ár.
Viðskiptaráð sendi einnig fyrirspurn þar sem óskað var eftir skýringum á því hvers vegna hlutfallið lækkar milli áranna 2023-2024 en svör hafa ekki borist að svo stöddu. Gögn fengin frá Rannís má nálgast hér að neðan.
| Ár | Fjöldi | Samþykkt | Hlutfall |
|---|---|---|---|
| 2015 | 313 | 268 | 86% |
| 2016 | 322 | 286 | 89% |
| 2017 | 390 | 363 | 93% |
| 2018 | 444 | 372 | 84% |
| 2019 | 475 | 404 | 85% |
| 2020 | 551 | 505 | 92% |
| 2021 | 585 | 531 | 91% |
| 2022 | 615 | 535 | 87% |
| 2023 | 664 | 542 | 82% |
| 2024 | 613 | 371 | 61% |
Heimildir
[1] Hagstofa Íslands. (2026). Minni útgjöld til rannsókna- og þrónunarstarfs hjá fyrirtækjum. Slóð: https://hagstofa.is/utgafur/frettasafn/visindi-og-taekni/utgjold-til-rannsokna-og-throunarstarfs-2024/
Tengt efni
Fjármálaráðherra ekki svarað erindi Viðskiptaráðs ári síðar
Tölustafaeinkunnir, samræmd próf og fækkun borgarfulltrúa meðal vinsælustu mála
Björn Brynjúlfur gestur í Þjóðmálum
Upptaka af Kosningafundi Viðskiptaráðs í Iðnó
Kosningapróf Viðskiptaráðs: hvar stendur þú?
