Kallað eftir svörum um Drekasvæðið: bréf til umhverfisráðherra

Í bréfi Viðskiptaráðs til Umhverfis-, orku- og loftslagsráðherra óskar ráðið eftir upplýsingum um rýni Umhverfis- og orkustofnunar á gögnum sem liggja fyrir frá fyrri olíuleit á Drekasvæðinu og hver næstu skref stjórnvalda í málinu verði.

Í svari við munnlegri fyrirspurn á Alþingi 18. september 2025 sagði Jóhann Páll Jóhannsson, umhverfis-, orku- og loftslagsráðherra, að stofnunin ynni að rýni gagnanna og að gert væri ráð fyrir að henni yrði skilað fyrir árslok. Að rýninni lokinni væri unnt að halda umræðunni áfram á grundvelli gagna, staðreynda og vísindaniðurstaðna.

Umræðan byggi á fyrirliggjandi gögnum

Viðskiptaráð telur mikilvægt að þeirri umræðu verði nú haldið áfram og skýrt verði hvernig stjórnvöld hyggjast fylgja niðurstöðum rýninnar eftir.

Ráðið hóf umræðu um mögulega olíuleit á Drekasvæðinu í september 2025 með úttektinni Auðlind í augsýn. Þar var fjallað um möguleg efnahagsleg áhrif olíufundar á svæðinu og bent á að útgáfa sérleyfa til olíuleitar fæli ekki í sér fjárhagslega áhættu fyrir ríkissjóð vegna sjálfrar leitarinnar.

Að mati Viðskiptaráðs er mikilvægt að fyrir liggi hvort og með hvaða hætti stjórnvöld hyggjast nýta fyrirliggjandi gögn til að taka upplýsta ákvörðun um framhald málsins.

Kallað eftir upplýsingum um næstu skref

Viðskiptaráð óskar eftir upplýsingum um hvort rýni Umhverfis- og orkustofnunar hafi verið afhent ráðherra og, ef svo er, hvort og hvar hún verði birt almenningi. Sé rýninni ekki lokið er óskað eftir upplýsingum um hvenær áætlað sé að henni ljúki.

Jafnframt er óskað eftir svörum um hvernig ráðherra hyggist fylgja niðurstöðum rýninnar eftir og hvort til skoðunar sé að bjóða að nýju út sérleyfi til leitar og vinnslu kolvetnis á Drekasvæðinu eða skapa með öðrum hætti skilyrði fyrir frekari rannsóknir og leit á svæðinu.

Viðskiptaráð telur mikilvægt að niðurstöður rýninnar og fyrirliggjandi gögn verði lögð til grundvallar næstu skrefum. Með því fæst skýrari mynd af þeim tækifærum sem kunna að felast á Drekasvæðinu og hvort tilefni sé til frekari rannsókna.