Viðskiptaráð verðlaunar Verzlunarskólastúdenta

Viðskiptaráð hefur í gegnum tíðina verðlaunað stúdenta sem útskrifast með láði frá viðskiptasviði og alþjóðasviði Verzlunarskóla Íslands. Útskriftarathöfn skólans fór fram laugardaginn 23. maí síðastliðinn og hlutu eftirtaldir nemendur viðurkenningu Viðskiptaráðs fyrir framúrskarandi námsárangur á stúdentsprófi:

• Tinna Björg Jóhannsdóttir, fyrir bestan árangur í viðskiptagreinum á viðskiptalínu.
• Ásta Dís Ingimarsdóttir, fyrir bestan árangur í alþjóðagreinum á alþjóðabraut.

Í verðlaun fengu þær eintök af hinu klassíska riti Hagfræði í hnotskurn eftir Henry Hazlitt og hátíðarritinu Viðskiptaráð Íslands í 100 ár, en Guðrún Inga Sívertsen skólastjóri Verzlunarskólans annaðist afhendingu verðlaunanna fyrir hönd Viðskiptaráðs. Fyrrnefnda bókin kom út árið 1946 en var fyrst gefin út í íslenskri þýðingu Haraldar Johannessen árið 2000. Bókin var nýlega endurútgefin að frumkvæði Rannsóknarmiðstöðvar um samfélags- og efnahagsmál og hefst inngangur hennar á tilvitnun í ritið sem dregur saman efni bókarinnar í hnotskurn: „Hagfræðin felst í því að líta ekki aðeins á skammtímaáhrif stefnu eða ákvarðana heldur einnig á langtímaáhrifin, og að skoða afleiðingarnar ekki aðeins fyrir einn hóp heldur alla hópa“. Þessi orð eiga jafn vel við í dag og þau gerðu fyrir 80 árum, en bókin fjallar auk þess um ýmsar hagfræðilegar ranghugmyndir sem sífellt skjóta upp kollinum í þjóðfélagsumræðunni.

Viðskiptaráð óskar Tinnu og Ástu innilega til hamingju með árangurinn og velfarnaðar í framtíðinni.