Fullt hús og frábær stemning á Viðskiptaþingi

Þingið hófst á erindi frá Birni Brynjúlfi Björnssyni, framkvæmdastjóra Viðskiptaráðs, þar sem hann fór yfir mikilvægi þess að Ísland mótaði sér stefnu, áttavita, sem tryggir að við höldum áfram að sækja fram og stöndum í stafni meðal þjóða. Hann sagði að vísbendingar væru um dæmigerða óheillaþróun þar sem góðir tímar búi til værukærð, værukærð leiði til stöðnunar og stöðnun leiði að endingu til slæmra tíma. Í því samhengi nefndi Björn straumhvörf í alþjóðamálum og að Evrópa væri orðin heimsmeistari í sjálfsmörkum.

Því næst hélt Birna Ósk Einarsdóttir, forstjóri Húsasmiðjunnar og fyrrverandi CCO hjá APM Terminals, erindi um eigin reynslu af íslensku hugarfari sem styrkleika í alþjóðlegu atvinnulífi. Þar nefndi hún að hugrekki, mannleg nálgun og seigla væru okkar helstu eiginleikar og hvernig traust er lykilinnviður í viðskiptum.

Þá stýrði Ásta Fjeldsted, forstjóri Festi, samtali við Heiðar Guðjónsson, hagfræðing og fjárfesti, og Friðrik Sophusson, fyrrverandi fjármálaráðherra og forstjóra Landsvirkjunar. Þar ræddu þau um áttavita fortíðar og framtíðar og hvernig megi skapa jarðveg fyrir umbætur í rekstri hins opinbera samhliða því að gefa einkamarkaði aukið svigrúm til að vaxa.

Að loknu hléi hélt Magnús Scheving, athafnamaður og frumkvöðull, líflegt erindi um forystu með frumkvöðlahugsun að leiðarljósi, tæknibyltinguna sem fleygir fram nú sem aldrei fyrr með tilkomu gervigreindar og mikilvægi skapandi hugarfars.

Þá steig Andri Þór Guðmundsson formaður Viðskiptaráðs á svið og kynnti tvo nýja heiðursfélaga Viðskiptaráðs, þau Árna Árnason og Hildi Petersen. Að því loknu bauð hann forseta Íslands, Höllu Tómasdóttur, velkomna á svið og áttu þau áhugavert samtal um erindi dagsins, ræddu um stöðu íslensks atvinnulífs og heimsmyndina eins og hún blasir við í dag. Halla nefndi þörfina á samtali milli ólíkra aðila til þess að finna megi farsæla niðurstöðu milli mismunandi sjónarmiða.

Að erindum loknum var skálað fyrir vel heppnuðu þingi undir lifandi tónlist.

Viðskiptaráð vill nota tækifærið og þakka sérstaklega þeim sem tóku þátt í dagskrá á þinginu. Við viljum jafnframt þakka þeim sem sáu sér fært að mæta og hlýða á það sem fram fór á þinginu.